أدار الحوار: وفاء زغلول
- من هي ألاء الحداد؟!
اسمي ٱلاء الحداد فنانة تشكيلية ومدرسة فنون ومصممة هاندميد
بكالوريوس تربية نوعية تربية فنية ٢٠١١ ، تمهيدي ماجستير ٢٠١٣ ، شاركت ف معارض داخل مصر في القاهرة والاسكندرية والمنصورة ودمياط والاسماعيلية و خارج مصر في بلجيكا وفرنسا و السعودية وروسيا
عملت معرض شخصي في تونس في وزارة الشباب ٢٠١٠ ومعرض في القاهرة ٢٠١٩
شاركت في معرض احياء الذكري ال٤٣ ليوم الارض الفلسطيني للقنصلية الفلسطينية بمتحف محمود سعيد بالاسكندرية ٢٠١٩
عملت مدرسة لتعليم النحت للاطفال في المنصورة والقاهرة من ٢٠١٩
- كيف بدأ حبك للنحت؟!
وانا في اولي جامعة لما اول مرة اشتغلت نحت ع الجبس والطين وبدأت احس بالماتيريال اللي شغالة بيها واني بدل ما برسم 2dimensions لا بعمل منحوتات بأبعاد اكتر واحساس الخامة اللي شغالة بيها بيخليني طلعت برا الواقع لعالم تاني ف حبيته اكتر
- كيف تبدأ فكرة المنحوتة؟!
منحوتاتي يا اما فكرة او قيمة انسانية بحاول اعبر عنها ..او فكرة نحت الشعر لما بدأت انحت قصايد الشعر ف منحوتاتي اني بدخل جوا القصيدة اكتر مش مجرد قراية لا بعرف تفاصيلها اتكتبت امتي وفين ولمين وازاي عشان اعرف اوصل للحالة بتاعت القصيدة وبعدين ابدأ احول الكلمات لخطوط واشكال بتعبر عنها زي الخط المنحني بيعبر عن مرونة وسلاسة وانسيابية والمنكسر او المستقيم او زوايا حادة بيدينا احساس صلابة وقوة او تذبذب و توتر …. بالشكل دا كل خط وكل شكل ليه معني بيعبر عنه ف بالتالي لما بدخل الحالة بقدر احولها لمنحوتة.
- لماذا لقبتي بنحاتة الشعر؟!
عشان بحول قصايد الشعر لمنحوتات ملموسة نقدر نشوف القصيدة من خلالها اكتر ..واشتغلت قصايد للشاعر الفلسطيني محمود درويش وشاعر العامية المصري عمرو حسن .
- ما هي الصعوبات اللي تواجهك؟!
مش صعوبات ع قد ما هي تعتبر مشاكل ان الوعي بالنسبة لناس كتير بتعتبر النحت انتيك ف البيت وظيفته جمالية فقط ودي فكرة بحس انها بتقلل من النحات او دوره ف المجتمع.
- ما هي أحب أعمالك؟!
عملين واحد لقصيدة لمحمود درويش اسمه “انتظرها” ( وانتظرها الي ان يقول لك الليل لم يبقي غيركما في الوجود..فخذها برفق الي موتك المشتهي وانتظرها ) . ومنحوتة لقصيدة تانية للشاعر المصري عمرو حسن اسمها ” الحرب العالمية التالتة” ( كان صوت طيرانهم مالي الجو
وانا وانتي غلابة ومش عاوزين..غير ارض تساع البني ادمين..من غير باسبور أو لون بشرة..من غير أموات جوه النشرة..عاوزين نصحى ف عالم أخضر…….انا هاخد أسرتنا معانا..هاخد أمي واختي واخويا..والصورة اللي فاكرها لابويا..وانتي معاكي أبوكي وامك..وعروستك وكتاب التلوين..وهناخد حفنة ميه وطين..وهناخد كلبي وقطتكم..وهنعمل بيتنا قصاد بيتكم ..ونعيد تشييد الكون بهدوء……)
- ما هي طموحاتك للمستقبل؟!
اوصل فكرتي للعالم واننا نوصل بالوعي ان النحت من اسمي الفنون وانه ابو الفنون زي ما احنا كفنانين عارفين ..واني اطلع جيل نحاتين صغير ان شاء الله ..وان شاء الله ف يوم من الايام تدرس السيرة الذاتية واسلوبي ف كتب الفنون
- أخيرا” .. ما نصيحتك للمقدمين علي فن النحت؟!
لازم احساسنا يوصل للخامة اللي بنشتغل عليها مجرد ما احساسنا هو اللي بيشتغل بنوصل لاعلي نقطة من الابداع والسعادة الذاتية كمان وطبعا بجانب دراسة علمية للنحت عشان نوصل لاعلي درجة من الابداع
