– بس احنا اتفقنا انك مش هتحطي زبدة الكاكاو الحمرا دي عشان الناس بيفتكروها روچ!
– ما هي روچ أصلا..
– يعني طول الوقت دا بتخدعيني؟!
– تؤ، اسمها بشتغلك.. بهاودك عشان تخطبني.
– بس انتي عارفة إني بغير
– لا عارفة إنك خنيق.. لا عايزني أحط روچ ولا مسكرة ولا حتى آي شادو
– يعني اللي فوق عينك دا آي شادو، مش عيب خلقي زي ما كنتي مفهماني؟
– بذكاءك كدا هيبقى عيب خلقي فوق عينيا الاتنين؟
– وخدودك الحمرا دي مش بسبب ارتفاع ضغط الدم؟
– ضغط الدم دا، أنا اللي هجيبهولك إن شاء الله.. لكن دا مورد خدود عادي!
– شعرك دا طيب ولا باروكة؟
– لا شعري
– كويس، فيكي حاجة عدلة أهو وشعرك طلع ناعم..
– دا سيشوار
– يعني كل دا fake؟
– اعملك إيه يعني؟ أنا عايزة عريس وانت غني بس خنيق
– بس دا اسمه خداع!
– تؤ، اسمه استكراض، كنت بستكرضك
– وأنا كنت مغفل!
– تؤ.. كنت هفأ، بحب أسمي الحاجات بأسماءها
– ……..؟!
– حقك تنتقم لنفسك وتفركشني.. صحيح مش هرجعلك دهبك عشان انت اللي سايب، بس يغور الدهب فدا كرامتك، يلا اضربني قلمين عشان ترتاح
– مش للدرجة دي يعني، ربنا غفور رحيم.
– وعزيز ذو انتقام برضه!
– مش هسيبك لأ
– دانا لابسة لينسز
– عشان نظرك ضعيف
– لا عشان حولة
– خلقة ربنا وأنا راضي بيها
– هممممم وبحط روچ أحمر
– مانا أهلاوي
– خلاص هدور على روچ أبيض
– التغير حلو برضه
– و….
– بقولك إيه أنا مش هفركش، لو عايزة تفركشي انتي اتفضلي
– والدهب؟
– اللي بيسيب بيتنازل عن كل حاجة
– طيب نقسم البلد نصين؟
– لا سيبي البلد على بعضها عشان مانتحبسش، والدهب كله يرجعلي!
– طيب انت اشتريته أيام الرخص، خد جرامات على قد فلوسك والباقي سيبهولي
– الدهب كله يرجعلي
– طيب سيبلي السلسة حتى
– ولا نص جرام.
– ……..؟!
– ……..؟!
– كدا؟ وأنا اللي كنت فاكراك كريم، طلعت بخيل
– مانا كنت فاكرك طيبة طلعتي حويطة
– اسمها حربوقة.. بحب أسمي الحاجات بأسماءها
– وبتحبي إيه تاني؟
– بحبك
– اللي بيحب حد بيسمع كلامه.
– مانا بسمع كلامك والله.
– بأمارة الروچ الأحمر اللي على شفايفك!
– دي؟! دي زبدة كاكاو!
الكاتب: محمد راضى